Et ass ee bekannten an ee beängschtegenden Zeenario: Et wëll een eigentlech um Fluchhafe schnell bis bei säi Gate kommen, mee virun engem zitt sech eng scheinbar onendlech Waardeschlaang bis bei de Sécherheets-Check. GlobeTrotter.lu verréit iech awer Tipps mat deenen ee bei der Kontroll méi schnell duerchkënnt. Aktuell an der Haaptreeszäit, dauert et scheinbar éiweg, bis een duerch de Sécherheets-Check um Fluchhafen duerchkënnt. Ganz ännere kann een dat leider nëtt, wëll vill Grënn léien nëtt an der Hand vum Reesender a genau Kontrolle sin jo awer och gewënscht.

Trick 1: Déi richteg Kleedung
De richtegen Outfit ka vill Zäit aspueren. Zum Beispill empfeelt sech eng Jackette mat villen Täschen oder ee klenge Rucksak fir déi wichteg Saache wéi d'Schlësselen, d'Bordkaart etc. Esou hutt dir schnell alles grëffbereet a kënnt virum Check d'Jacketten oder de Rucksak op d'Band ofleenen, aplaz ëmständlech all Klengegkeet aus der Box erauszehuelen.
Ausserdeem sollt dir op är Schong oppassen: Wat méi deck d'Suel oder den Oofsatz ass, wat d'Wahrscheinlechkeet méi grouss ass dass dir speziell nach gechecked gitt. Frae sollen zousätzlech op ee BH ouni Bigel oppassen a béid Geschlechter entweder op ee Rimm verzichten oder dëse virdrun op d'Band sëtzen. Grondsätzlech: Schon virun der Sécherheetskontroll sollt dir all d'Kleederstécker, déi een ausdoe kann, ofgeluecht hunn.

Trick 2: Déi richteg Schlaang eraussichen
Nëtt ëmmer ass déi kierzte Schlaang och déi schnellst. Stellt iech prioritär hannert Léit mat engem Aktenkoffer oder Business-Kostüm: Geschäftsleit reese vill, huelen oft nëmmen dat Noutwendegst mat a si bei de Kontrollen oft méi schnell.
Ofstand hale sollt dir och vun diskutéierende Reesgruppen oder wéineg routinéiert wierkend Passagéier, déi ganz offensichtlech nëmme wéineg fléien oder den Oflaf net am Detail kënnen. Vermeit zudeem Schlaangen, an deene Léit mat puer oder deelweis riseg Handgepäckstécker stinn. Am längsten dauert et fir gewéinlech och bei Famille mat Poussetten, Autossëtzer oder mat klenge Kanner, déi nëtt ëmmer matmaache wëlle wéi d'Elteren sech dat wënschen.

Trick 3: D'Reegelen kënnen
Reegel Nummer 1: All d'Flëssegkeeten iwwert 100 Milliliter si verbueden a jo, dozou gehéieren och Kosmetikartikelen, Crèmen oder Parfum.
Reegel Nummer 2: Flëssegkeete bis zu 100 Milliliter mussen an ee verschléissbare Plastikssak.
Reegel Nummer 3: Déi maximal Meng un Flëssegkeet ass an der EU (an och bal soss iwwerall) vun 1. Liter (also: 10 x 100 Milliliter).
Reegel Nummer 4: Laptops, awer och Tabletts an E-Readers, mussen ëmmer separat ausgepaakt ginn.
Dës Reegele sollt dir och onopgefuerdert ëmsetzen, zum Beispill schon Doheem är Flëssegkeete verpaken an nëtt op de Plastikssak vum Sécherheetspersonal vertrauen. Paakt äre Laptop ouni Opfuerderung aus. Kontrolléiert sëlwer virum Sécherheets-Check, ob d'Waasserfläsch wierklech eidel ass. Dës Klengegkeeten erspueren iech an allen aneren Zäit.

Nëmmen nëtt: Schlecht virbereet sinn
"Ohnee, do hunn ech d'Bordkaart ganz ënnen a meng Täsch gestach" oder "Ups, do war wuel awer nach déi eng Waasserfläsch am Rucksak" - esou Sätz héiert ee beim Sécherheets-Check leider oft. Wann een sech schlecht virbereet, hält een de Betrib op. Dofir: Nëmmen apake wat ee wierklech brauch a wichteg Géigestänn, wéi d'Bordkaart oder de Pass, grëffbereet halen.
Profi-Tipp: Leet d'Géigestänn schon an der Reiefolge op d'Band, wéi dir se dono och erëm unditt/apaakt.

Nëmmen nëtt: Blöd Witzer maachen oder diskutéieren
Et ass den einfachsten Tipp, mee muncher hunn et awer schwéier domat: Näischt soen. Domm Witzer wéi "Kloer, hunn ech eng Bomm!" oder "Hutt dir d'Kokain schon a menge Schong entdeckt?" sinn nëtt witzeg a kënne schlëmmstefalls zu der Festnam féieren. Och Diskussiounen, wéi zum Beispill iwwert d'Waassermeng, sinn nerveg a sënnlos ;-)

Déi automatesch Kontroll vun den Reespäss gouf elo och um Lëtzebuerger Fluchhafen agefouert. Dobäi geet et ëm Passagéier, déi aus Länner ausserhalb vum Schengen-Raum fortfléien oder ukommen, also 20 Prozent vun den Passagéier déi um Findel am Transit sinn. Konkret goufen 10 nei automatesch Dieren bei den Police-Kontrollen installéiert, bei deenen d'Police weiderhin och nach manuell Kontrollen duerchféieren wäert. Fir vun den Apparater gebrauch maachen ze däerfen, mussen d'Reesender iwwer 18 Joer am Besëtz vun engem Europäeschen oder engem Schwäizer registréierten biometreschen Pass sinn. D'Dokument gëtt, genau esou wei och d'Gesiicht, gescannt, éier d'Dier opgeet. "Et dauert ongeféier 20 Sekonnen, wann alles dem Standard entsprécht. Et gëtt nach ëmmer een Grenzposten, fir den Fall, dass d'Foto falsch opgenomm gin wier, d'Dier manuell opgemaach misst ginn oder wann et een Problem mam Reesender géif ginn, woubäi eng méi spezifesch Kontroll néideg wier", erkläert Lisa Waldbillig, Assistentin vun der Fluchhafenpolice.
No 7 Méint Aarbechten goufen d'Kontroll-Reien vun 3 op 9 an Richtung "Arrivée" an vun 3 op 8 an Richtung "Départ" erhéicht. Dat wäert d'Waardezäit fir d'Reesender verkierzen an mëscht den Findel zu engem modernen Fluchhafen, seet d'Rebecca Pecknik-Welsch, Medien- an Kommunikatiounsmanager bei Lux-Airport. Dës Modernisatioun ass ëmsou wichteg, do ëtt ëmmer méi Reesziler ausserhalb vum Schengen-Raum ugebueden ginn, wéi d'Erëffnung vun enger Verbindung an d'Emiraten, op Ras al-Khaima (liest och eisen Artikel: "Lëtzebuerg: D'LuxairTours flitt an d'Emiraten, mee wat gëtt gebueden?") ab Oktober 2018. "Matt der Aféierung vun den automatiséierten Grenzkontroll-Dieren hunn mir onst gemeinsamt Ziel erreecht, nämlech den Service fir den Passagéier ze erhéijen an gläichzäiteg eis Grenzen méi sécher ze hunn", ënnersträicht den Etienne Schneider, Wirtschaftsminister an Minister fir intern Sécherheet.
D'Investitiounen fir d'Moderniséierung belafen sech op 3,65 Milliounen Euro, wou 2,35 Milliounen Euro vum Fluchhafebedreiwer an 1,3 Milliounen Euro vum Staat gedroen ginn, wou dorënner 64 Prozent vun der EU co-finanzéiert ginn. "Dësen Projet ass een perfekt Beispill dofir, wéi mir zesummen mat eisen Partner Technologien asetzen, ëm d'Zieler vun eisem Fluchhafenkonzept ze erreechen andeems mir den Komfort vun gréisser Fluchhäfen mat der entspaanter Reeserfahrung vun klengeren Regionalfluchhäfen kombinéieren", seet d'Renée Steinhaus, CEO ad interim vun Lux-Airport.