Op dëser Insel an der Karibik kann ee mat Flamingoe bueden

'Renaissance Island' ass eng Privatinsel virun Aruba an der Karibik - an d'Doheem vu villen zahme Flamingoen. Wien et sech leeschte kann, chillt do mat de rosa-faarwege Villercher op der Plage an kann niewent hinne bueden. GlobeTrotter.lu hëlt iech op d'Insel mat.

Op der Privatinsel 'Renaissance Island' liewe Flamingoen op der Plage. D'Insel gehéiert engem Luxushotel mee och Dages-Visiteure kënne mat de rosa-faarwege Villercher puddelen. D'Flamingoe sinn de Léit gewinnt a loossen d'Visiteuren an hier Géigend. Op 'Instagram' si puer vun deenen exotesche Plage-Bewunner dowéinst bekannt ginn: D'Déiere kommen an de soziale Medien oft fir an zéien ëmmer méi Touristen op d'Plage. Fir d'Hotelsgäscht ass de Besuch vun der Flamingo-Plage natierlech gratis - allerdéngs kascht eng Iwwernuechtung am 'Renaissance Aruba Resort & Casino' am Duerchschnëtt ronn 300 Euro.

Wien net sou deier iwwernuechte wëll kann de Flamingo Beach och mat engem Dagesbilljee besichen, wann den Hotel net méi wéi 80% ausbelaascht ass. Well d'Visiteurszuel ass streng limitéiert! Fir mat engem Dagesbilljee op d'Privatinsel ze kommen, brauch een also bëssi Chance an et sollt ee matzäit am Viraus plangen. Ganz bëlleg ass och dës Optioun net: Ëmmerhin nach ongeféier 112 Euro bezilt een fir den Ausfluch zu den elegante Villercher, inklusive Bootsfahrt, Iessen a Gedrénks. D'Online-Buchung ass nëmmen ab 7 Auer um Virdag méiglech an d'Ticketen an der Reegel innerhalb vu puer Minutten ausverkaaft. Et sollt een sech also de Wecker stellen an am beschte puer Deeg op Aruba verbréngen, wou een säi Gléck probéiere kann. All 15 Minutte fueren d'Booter tëschent dem Hotel an der Privatinsel hin an hir, bericht de Portal 'Getting Stamped'. Nëmmen 8 Minutten dauert d'Iwwerfaart.