Polen: Hei gëtt déi déifste Schwämm vun der Welt gebaut

Zu Mszczonow a Polen, déi ongeféier 50 Kilometer südwestlech vu Warschau léit, gruewen de Moment schon Bagger déif an d'Äerd. Well hei soll de 'Deepspot Diving Pool' entstoen, dee mat 45 Meter dann déi déifste Schwämm vun der Welt gëtt. Zum Verglach: D'Schwämm wär da méi déif, wéi een Haus vun 12 Etagen. Gebaut gëtt d'Schwämm vun der Firma 'Deepspot', eng Duechterfirma vun der polnescher Firma 'Flyspot', déi sech op Banneschwämme spezialiséiert huet. "Natierlech ass eis Schwämm déi déifste vun der Welt", sot de Manager Bartosz Wiecek vun der Firma 'Flyspot' stolz. No de Pläng gëtt net déi ganz Schwämm mee nëmmen eng schmuel Passage 45 Meter déif. Mat 8000 Kubikmeter Capacitéit, wat ongeféier 27 Mol sou vill wéi an enger normaler 25-Meter Schwämm ass, soll de Baseng och nach de weltgréisste sinn, wéi d'Firma ugëtt. Am ieweschte Beräich ass d'Schwämm an verschidden Déiften ënnerdeelt. Doduerch ass et net nëmme fir Expertensportler, mee och fir Dauchufänger gëeegent. An fir all, déi de Kontakt mam Waasser fäerten, soll et och nach ee besonneschen Highlight ginn: Een Ënnerwaassertunnel. Dës Iddi ass awer net nei. Och bei der aktueller Rekord-Schwämm, de Pool 'Y-40 - The Deep Joy' am italienesche Padua, kenne Visiteuren den Daucher duerch een Ënnerwaasser-Tunnel nokucken. Aktuell ass awer nach onkloer, wéi laang den neie 'Deepspot Diving Pool' de Rekord hale kann. D'Erëffnung ass laut Bedreiwer nämlech fir dësen Hierscht geplangt. An nëmme 6 Méint méi spéit soll eng weider Anlag am britesche Colchester opmaachen, déi nach 5 Meter méi déif soll sinn.