Italien: Zu Venedeg plakeg an de Kanal schwamme gaange - 3000 Euro Strof

2 Touristen aus Tschechien wollten déi wéineg Stonnen Openthalt zu Venedeg esou richteg genéissen an hunn sech dozou entscheet an de Kanal hannert der Markusplaz bueden ze goen. An dat ganzt ouni Kleeder! Matten an der historescher Alstad sinn déi zwee Männer ganz plakeg schwamme gaangen. Mee de Spaass ass um Dënschdegowend net onbemierkt bliwwen. Se hunn gelaacht, gegeckst, ... a sollen Angabe vun der Lokalzeitung 'Corriere del Veneto' no, aner Persounen op sech opmierksam gemaach hunn. Foussgänger hunn déi 2 Männer entdeckt an d'Police alarméiert, déi den Ubléck iwwerhaapt net witzeg fonnt hunn. Se hunn déi zwee Touriste gezwongen aus dem Kanal eraus ze schwammen an sech erëm unzedoen. An domat net genuch. Den Ausfluch huet kuerzerhand mat enger Faart um Policebüro opgehale. De béid dréit elo eng Geldstrof vu jeeweils 3.000 Euro. Anscheinend hunn déi zwee bei engem Fussballspill vun hirer Mannschaft 'Slavia Prag' géint den 'Inter Mailand' ze vill gedronk. Vum Fussballstadion zu Mailand sinn déi zwee Dënschdegowend op Venedeg gefuer fir do plakeg schwammen ze goen. Um Policebüro hätten si de plakege Pleséier mam waarme Wieder begrënnt. Och dat huet näischt bruecht, well zu Venedeg gëlle fir Touristen zimlech streng Reegelen, déi fir méi Anstand an Uerdnung, an där vum 'Overtourism' geplote Stad, féiere sollen. Ganz uewen op der Verbuetslëscht steet d'bueden an de Kanäl - ob mat oder ouni Kleeder. Dass d'Autoritéite bei Verstéiss haart duerchgräifen, wéisst ee Fall vun enger kanadescher Touristin, déi net mol buede gaangen ass, mee sech am Stadpark am Bikini gesonnt huet an 250 Euro Strof kritt huet (eisen Artikel hei liesen).