Italien: Touriste klauen a Sardinien Sand - elo dréit hinne Prisong

Wollten se sech domat eng eege kleng Plage Doheem uleeën? Wisou eng Koppel no der Vakanz am ganze 40 Kilo Sand am Gepäck haten ass onkloer. Fakt ass awer: Si mussen dofir mat enger Prisongsstrof vu bis zu 6 Joer rechnen! Déi franséisch Touristen hate Vakanz zu Chia am Süde vu Sardinien gemaach. Kuerz virun der Heemrees haten si wäisse Sand an am ganze 14 Fläsche gefëllt an an der Mall vum Auto gepaakt. Se wollten domat op d'Fähr vu Porto Torres op Toulon a Frankräich klammen, dat bericht d'Zeitung "Corriere della Sera". Mee d'Autoritéiten hunn de Mann an d'Fra gestoppt a béid festgeholl. Se goufe wéinst schwéierem Déifstall ugeklot. D'Koppel huet uginn, de Sand als Souvenir agepaakt ze hunn. Se hätten net gewosst, dass si dobäi eng Strofdot beginn. Op Sardinien ass et net erlaabt Muschelen, Kiselsteng oder och Sand matzehuelen. Och d'ausleeë vun Handdicher direkt um Sand ass do tabu. De Grond dofir ass, dass de Sand op Sardinien ëffentleche Gutt a wichteg fir den Ökosystem vun der Insel ass. An e puer Fäll goufe schonn Touristen erwëscht an hunn missten doropshin eng Strof bezuelen. Esou huet ee Mann 100 Euro Strof bezuelt well hien säin Handduch zu Stintino op de Sand geluecht huet. An een Englänner huet missten 1.000 Euro bezuele well hien eng Fläsch Sand mathuele wollt.