De Schluss vun enger Bezéiung ass meescht kee Grond ze féieren. Aplaz ze traueren, kéinte frësch Gescheedener awer och déi positiv Säite gesinn an endlech mol erëm mat de Kollege verreesen. Dat fënnt opmannst de briteschen Tour-Operator 'Virgin Holidays' a bitt 3 Trennungs-Offere fir Reesen op Las Vegas un. Wou, wann net an der Stad vun de Casinoen, vun de Partyen an der Superlative, kéint een seng Scheedung besser féiere wéi zu Vegas? Fir 999 Pond (ongeféier 1.113 Euro) bis 2.499 Pond (ongeféier 2.785 Euro) kënnen déi néi Singlen mat hire beschte Frëndinnen a Frënn op d'Pool-Party, mam Helikopter iwwert de Strip fléien. Nach méi Ofwiesslung gefälleg? Dofir suerge Strip-Showen, Personal Shopping, Luxus am Spa oder souguer fir de Frust lass ze ginn ee Boxtraining. Gëtt ët fir Scheedungs-Tourismus iwwerhaapt ee Marché? Ee 'Virgin'-Spriecher ass dovun iwwerzeegt: "Fir all zweete briteschen Erwuessene gëtt d'Scheedung leider zur Realitéit, wat emotional belaaschtend ass. Dofir hunn mir eng Rei nei Offeren erausbruecht, déi dorop ausgeriicht si fir eise Clienten eng wuelverdéngte Paus ze erméiglechen", sot hien der Zeitung 'Sun' géigeniwwer. Enger britescher Ëmfro no loosse vill bestuete Koppelen d'Bezéiung zu hire Kollege schleefen. Deem géigeniwwer verdéiwe bal genau esou vill hier Frëndschaft wärend enger Scheedung erëm. Den nei gewonnen Zesummenhalt bei enger Rees feieren ass eigentlech keng schlecht Iddi.

Vun Manhattan aus mam Boot zu senger eegener Privatinsel fuere mat, am Réck d'Skyline vun New York. Esou kéint den Alldag als Besëtzer vun der Insel Columbia ausgesinn. Well se steet de Moment zum Verkaf. Nëmme puer Minutte mam Boot soll et dauere bis een op der Insel, déi zum Quartier Bronx gehéiert, ukënnt. Do fënnt een eng Villa mat 4 Schlofzëmmere wou een sech eng Rou-Oase schaarfe kann, a wou ee vum Daach aus op New York kucke kann. An zu enger Insel gehéiert och eng Plage. Déi ass am Kafpräis vun 13 Milliounen US-Dollar mat dra wéi d'Zeitung 'New York Post' bericht. Dat ass déi stolz Zomme, déi fir déi 5.600 Quadratmeter grouss Insel fälleg sinn. Inseréiert ass d'Immobilie vu 'Sotheby's International Realty'. Den aktuelle Besëtzer, den Al Sutton, huet bei 'Bloomberg' vu senger Privatinsel geschwäermt: "Et ass einfach nëmmen herrlech - Den Himmel, Villercher, alles". Fir vill manner Geld, nämlech 1 Millioun Dollar, huet hien d'Insel virun 12 Joer kaf. Deemools soll se nach een "Albdram" gewiescht sinn, wisou den Al nach eemol 8 Milliounen an d'Wunneng investéiert huet. Wierbelstuerm-Sécher a voll equipéiert mat Solarbedriwwener Elektrizitéit an enger Entsalzungsanlag fir eegent Drénkwaasser, huet den Al d'lescht Joer de Projet fäerdeg kritt. Mee anzéie well hien awer net. Wisou? Déi 11 Joer Bauzäit ware fir hien net einfach: "Ech sinn elo 85 an ech denken, wou ech d'Insel kaf hunn, war ech a menge 70er an deementspriechend éiergäizeg". Elo wéilt hien anere Léit dës Méiglechkeet ginn.

Falls ee ganz bequem um Sonnendeck an der Ligestull faulenze wëll a bemol de klengen Honger kënnt, huet 'Carnival Cruise Line' elo op hier eege Schëffer ee spezielle Service an der Offer. Mat enger App kann een do Pizza a Béier ganz einfach iwwerall um Croisièresschëff bestellen. Mat Hëllef vun der eegener Croisière's-App 'HUB App' kann een net nëmme virun der Rees online anchecken, d'Buchung verwalten an d'Platzen am Bordrestaurant reservéieren, mee och wärend der Croisière Iesse bestellen. De Pizza-Service vun der App ass iwwerall un Bord disponibel an huet och Gedrénks an der Offer. Fir sech dann d'iesse liwweren ze loossen, muss een dann einfach nëmmen de Standuert um Schëff markéieren an ee Selfie schéissen, domat de Serveur een erkennt. Bis elo gëtt et de Service op der „Carnival Conquest“, der „Carnival Liberty“, der „Carnival Glory“ an der „Carnival Sensation“. Gläich soll awer déi komplett Flotte mat dësem Service equipéiert sinn.

Ronn 14 Milliounen Touriste reesen, Schätzungen no, pro Joer an d'USA. Vill vun hinne mussen sech elo op verstäerkten Iwwerpréiwungen hirer Persoun astellen. An zwar vun de soziale Medien. Bis elo war d'Ugi vum Profilnumm bei der Visumufro optional. Fir déi meescht Memberstaaten vun der EU soll dat fir d'Reeserlaabniss och weider esou bleiwen, och fir d'Lëtzebuerger. Dat bericht ënnert anerem 'die Zeit'. De Grond: Am Kader vum 'Visa-Waiver-Programm' kenne Bierger bis zu 90 Deeg ouni Visum an d'USA areesen. Leit mat polneschem, rumäneschem oder kroateschem Pass mussen awer beispillsweis virun USA-Reesen ee Visum ufroen an elo hier Identitéit an de soziale Medien ofleenen. Kritiker wei d'ONG 'Amercian Civil Liberties Union' huet de Virschlag schon am Virfeld als 'Profiling' an Diskriminéierung bezeechent, bericht 'Bloomberg'. Dem 'U.S. Department of Homeland Security' no sollen domat ënnert anerem Informatiounen aus der Demande ofgeglach ginn. Doduerch kann zum Beispill méigleche Bedruch entlarvt ginn. "Soziale Medie kennen hëllefen, bedenklech Persoune vun den aneren ze trennen..." heescht et ënnert 'Froen an Äntwert'. ​D'Reegel gëllt awer wei gesoot net fir de sougenannten ESTA. Dat ass usech kee Visum, mee eng Reeserlaabnis, déi online ugefrot ka ginn. Bierger déi un de 'Visa-Waiver-Programm' deelhuelen, wei d'Lëtzebuerger, kennen zwar ouni Visum an d'USA areesen, mee se brauchen awer den ESTA.

"Mamma, Pappa, wou léit eigentlech d'Sesamstraße?". Op dës Fro gëtt et elo eng einfach Äntwert: Zu New York! Genau gesot un der Kräizung vu Broadway an déi 63. Strooss. An der Präsenz vun Ernie, Bert, Groof Zahl, Elmo asw gouf d'Schëld den 1. Mee feierlech presentéiert. De Buergermeeschter vun New York, de Bill de Blasio, huet den Numm fir de 50. Gebuertsdag vun der Kannerserie elo permanent geännert. Virun 10 Joer, fir de 40. Gebuertsdag, hat eng Kräizung schon mol provisoresch den Numm kritt. Gedréint gëtt op der Platz zwar net, mee an der Géigend huet d'Organisatioun 'Sesame Workshop' säi Sëtz. Se produzéiert d'Sendung säit 1969. Déi éischt däitsch Folge gouf 4 Joer méi spéit gewisen. Ëmmer erëm spekuléieren US-Medien, vu wéi eng Stroossen oder Quartieren sech d'Produktioun bei der Gestaltung vun den Zeenen inspiréiere loossen. De 'Smithonian Magazine' huet Theorië gesammelt an nennt ënnert anerem Harlem, Queens, de Bronx an den Upper West Side als Inspiratiounsquellen. Mat der néi ernannte Sesamstraße hunn Fans elo awer ee festen Ulafpunkt, fir an der Gebuertsstad vun hirer Liiblingsserie eng Erënnerungsfoto ze schéissen.

Vun extremer Freed sech erëmzegesinn iwwert Fluchangscht bis hin zu Häerzensbriechend Verabschidungen: Op de Fluchhäfe pralle vill Emotiounen openeen. Gemëscht Gefiller sinn och beim Michelle Belleau a beim Ron Peterson ausgeléist ginn. Well do wou hier Fernbezéiung säit 12 Joer ëmmer erëm virun der Ballastprouf gestallt. No ville Verabschidungen a ville Fluchmeilen, hunn déi 2 hier Léift genau do, an engem Fluchhafen am Ohio, mat enger Hochzäit gekréint. An der Hal beim Gepäckband am 'Cleveland Hopkins International Airport' hunn sech d'Michelle an de Ron d'Jo-Wuert ginn. 125 Gäscht, dorënner Famill a Frënn, waren agelueden, bericht déi lokal Zeitung 'Cleveland'. Virun 12 Joer, am Abrëll 2007, hunn sech d'Michelle an de Ron um Gepäckband 6 vum Fluchhafe kenne geléiert. Daat ass hier Libesgeschicht: Si schafft am Marketing-Beräich a sollt ee Client mam Numm Ron Peterson aus Los Angeles do ofhuelen. Et huet direkt gefunkt. Mee de Problem ass awer dass de Ron als Chef vun enger Plackefirma zu Los Angeles schafft an d'Michelle op der anerer Säit vun den USA wunnt, an deem méi wéi 3.000 Kilometer entfernte Cleveland. Déi meeschten Zäit vun hirer Fernbezéiung hunn si dowéinst am Fliger verbruecht oder um Fluchhafen. Trotzdeem: "Ech hätt mir näischt besseres virstelle kéinten", begrënnt de Ron seng Wal fir déi ongewéinlech Hochzäitsfeier. Hien wollt onbedéngt do bestuet ginn, wou sech déi 2 kenne geléiert hunn.

De Mann war geschter Donneschden mat enger Reesgrupp aus Hong Kong am Grand Canyon ënnerwee. Wou hien d'Aussiicht vum 'Eagle Point' fotograféiere wollt, ass hie puer Meter an d'Déift gestierzt an ass gestuerwen. De Mann wollt déi wonnerschéin Aussiicht am Grand Canyon afänken an huet sech dofir ganz no un d'Kant vum 'Eagle Point' am Weste vum Grand Canyon gewot. Dobäi ass hie vum Fiels an d'Schlucht gefall. Ee Spriecher sot der Lokalzeitung 'AZ Central' géigeniwwer dass vill Gruppememberen aus Hongkong ganz no vum Ofgrond Fotoe gemaach hätten. Ee Rettungshelikopter konnt den Tourist nom Fall vun "puer Dosende Meter" an d'Déift nëmmen nach Doud um Buedem biergen. D'Läich gouf an d'Klinik bruecht. Um 'Eagle Point' léit de Skywalk, eng Touristenattraktioun bei där Visiteuren op enger gliesener Bréck iwwert de Grand Canyon lafe kënnen. Et ass den zweeten Doudesfall am Grand Canyon dës Woch: Een anere Visiteur war Dënschden am 'South Rim' verongléckt, bericht "CNN". D'Ëmstänn vum Doud wieren nach onkloer.

Am Zentrum vu Manhattan op 319 Meter Héicht de Bléck aus engem gemittlechen Hotelszëmmer op de 'Hudson River' genéissen, an dat vun engem Warzeeche vun New York aus: Dat kéint schon bal Realitéit sinn. Den traditiounsräiche 'Chrysler Building' gouf viru kuerzem vum 'Karstadt'-Proprietär, dem Ren Benko, an engem amerikanesche Partner fir 151 Milliounen US-Dollar kaf. An hie kéint sech virstellen aus dem Gebai een Hotel ze bauen. Villäicht kéinten Touristen also bal an op der 405 Lexington Avenue, Eck 42st, anchecken. Bis elo konnten Touristen de 'Chrysler Building' nëmme vu bausse kucken an héchstens ee Bléck an d'Lobby geheien. Eran dierft nëmmen, wien ee Rendez-vous an engem Büro an de 77 Stäck hat. Trotzdeem ass d'Héichhaus ee ganz beleiftent Fokomotiv vun New York. Géigeniwwer vun der Noriichten-Agentur 'Bloomberg' hunn d'Investeren hier Ëmbau-Pläng verroden: Domat am 'Chrysler Building' tatsächlech Hotel-Gäscht anchecke kennen, wieren 150 bis 250 Milliounen US-Dollar noutwendeg. Dat wieren am Maximalfall also méi wei 220 Milliounen Euro. De Moment befannen sech an deem prächtege Gebai nëmme Büroen, mat onbeschränktem Bléck op New York. Dëss an Hotelszëmmeren ëmzebaue kéint schwéier ginn, mengt d'Immobilienexpertin Lawrence Wolfe. Och problematesch: D'Receptioun steet ënnert Denkmalschutz.

Bis zu 1 Meter Neischnéi, Stroumausfäll an een Doudegen: De Stuerm 'Ulmer' huet d'Regioun vun de 'Rocky Mountains' an den ieweschte Mëttele Weste vun den USA gëschter fest am Greff. Mat enger Hurrikan-Wandstäerkt 2 huet de Stuerm an deem Deel vum Land geblosen an huet de Verkéier op de Stroossen an an der Loft flaachgeluecht. Besonnesch staark getraff ass d'Stad Denver am Colorado. Amerika-Wäit si bal 2.000 Flich ausgefall, weider 2.700 Flich goufe verréckelt. Dat bericht "USA Today". De Stuerm suergt virun allem um 'Denver International Airport' fir Chaos. Den undauernde Schnéifall huet d'Landepiste onbefuerbar gemaach. Um Mëttwochnomëtte goufen se zäitweis zougemaach. D'Wierder huet sech iwwert d'Nuecht berouegt, soudass de Buedempersonal mat dem botze vun de Landepisten ufänke konnt. Mëttwochmueren huet de Fluchhafe bekannt ginn, dass 4 vun de 6 Landepisten erëm op wieren. Passagéier solle bei de Fluchgesellschaften iwwert de Status vun hirem Fluch informéieren. Och op de Fluchhäfe vun aner US-Staaten wei Illinois a Wisconsin hunn sech d'Auswierkunge vu 'Umer' gewisen: Zu Chicago sinn duerch de staarke Reen Flich vun der Fluchgesellschaft 'Southwest' gestrach oder verspéit ginn. ​Ee Polizist ass bei engem Asaz em d'Liewe komm, huet d'Police op 'Twitter' bekannt ginn. Bis elo ass dat deen eenzege bekannten Doudesfall. Bei den zuelräichen Accidenter op de Stroossen gouf glécklecherweis soss kee verletzt. Méi wei 100.000 Awunner aus dem Colorado hunn um Mëttwoch missten ouni Stroum auskommen, bericht 'CBS'.

Zuelräich Nationalparke an den USA hunn am Joer 2018 Visiteur-Rekorder gebracht. Esou vill Touriste wéi ni virdru koumen an d'Nationalparke 'Arches' a 'Bryce Canyon' am Bundesstaat Utah, no dem 'Death Valley' a 'Joshua Tree' a Kalifornien souwéi nom 'Grand Teton' am Wyoming. D'Gesamtzuel vun allen Nationalpark-Visiteuren an den USA ass zwar am leschten Joer em 3,8 Prozent zeréck gaangen an huet 318,2 Milliounen erreecht. Se war awer déi drëtthéchst bis elo gemoossen, an zum véierte Joer noenee gouf 'NPS'-Angaben no déi 300 Milliounen-Limitt iwwerschratt. Dat huet den US-Nationalpark-Service (NPS) zu Washington matgedeelt. Am ganze gi 418 Uerter vum 'NPS' verwalt, niewent den 61 Nationalparken och zuelräich Monumenter an historesch Platzen. 385 vun dëse Uerter zielen hier Visiteuren. Angabe vum 'NPS' no goufen an den Parken och 13,95 Milliounen Iwwernuechtungen enregistréiert. Déi meeschtbesichten, vum 'NPS' verwaltent Platz, war am Joer 2018 de 'Golden Gate National Recreation Area' zu San Francisco mat gutt 15,2 Millioune Visiteuren. Hannendrun de 'Blue Ridge Parkway' (knapp 14,7 Millioune Visiteuren) an dem 'Great Smokey Mountain Nationalpark' (11,4 Millioune Visiteuren). De 'Grand Canyon Nationalpark' am Arizona, dee mat villen Aktivitéiten dëst Joer säin 100 järege Bestoe féiert, koum 2018 op déi Rekordzuel vu bal 6,4 Millioune Visiteuren.